ADTREK-MC Goes Beyond Mountaineering

Bilang tugon sa panawagan ng ilang ahensya ng gobyerno at ilang pribadong sektor matapos ang sunud sunud na bagyo, bumuo ng isang volunteer group ang ADTREK. Matapos ang ilang tawag sa DSWD, NDCC, PNRC, MFPI at ABS-CBN tutungo ang grupo sa ABS-CBN Foundation bilang volunteers na ang nais ay ma-deploy sa Quezon upang makatulong sa pamamahagi ng relief goods.

mga volunteers sa sagip kapamilya noong sabado. nahati ang grupo sa tatlo. 2 nagpaiwan sa abs-cbn foundation volunteer center para mag-repack, 5 na-deploy sa bulacan, at 4 sa bicol for relief good distribution operation

Sabado ng umagang umaga, nagtungo ang walong miyembro sa foundation. sa kadahilanang nakaalis na ang mga grupong patungng Quezon, nagkasundo ang lahat na manatili duon,habang umaasang made-deploy, upang tumulong sa pagrerepake ng mga donations, taga-load at unload ng mga sako-sakong donations sa mga truck na naghahakot. habang tahimik na nagtatrabaho ang grupo kasama ng ilan pang volunteer ay may isang matandang lalaki ang galit na galit na nagsisisigaw sa kalsada, bakit daw makalat sa harapan ng bahay nya? " this is my property!... you're damaging my property!" kasabay ng mga katagang iyon ay ang pagsipa sa ilang kalat na sinasabi nya. oo nga. makalat ang lugar ng datnan namin yun. isang palatandaan na marami ang taong naroon ng gabing nagdaan upang tumulong sa madaliang pangangailangan ng mas maraming taong nasalanta. naisip nya kaya yun habang nagwawala sya? naisip nya rin kayang sa dinami dami ng kapitbahay ng foundation ay sya lang yata ang ganun? para di na lang humaba ang kanyang litanya ay nagtulong tulong na lang ang lahat ng volunteer dun upang linisin ang lugar.

dito pa lang ay nahati na ang grupo, ang lima ay isinama sa isang truck na syang naghahakot ng mga natapos ng i-repack na relief, sa madaling sabi, mga kargador. nakailang balik din sa gandia, studio 14 at amoranto hangang sa nagkaroon ng assignment ang grupo - BICOL. habang naghihintay ng oras ng pag-alis, nabuong muli ang adtrek sa amoranto. dito ay ilang trak ang
tinanggalan at nilagyan ng sako-sakong relief ng makailang ulit. dumating pa ang tatlong adtrekkers at ang coordinator ng mga volunteer at sinabing pwedeng umabot ng 3-4 na araw ang operation sa bicol. tapos tayo dun!!! uwian na? usap muna ang lahat, sa huli ay apat lang ang nagnais na tumuloy sa bicol. at para mas exciting, may kasama kaming 2 6X6 truck ng air force at ang mga volunteer ng fedex/air 21... nang mapuno namin ang truck ng fedex/air21 ay sumama na kami pabalik sa scout gandia upang dun na hintayin ang ilang minuto bago tumulak pa-bicol, yun ang akala namin...

sako-sakong mga damit at pagkain ang binuhat ng mga volunteers, inihahanda ito para deployment sa mga lugar na nasalanta ng bagyo. kitang-kita sa mga mukha ng mg mga adtrekkers ang taos sa pusong pagtulong, kahit mahirap at nakakapagod ay tuloy-tuloy pa rin ang serbisyong totoo :)

pagbalik namin sa opisina ng AFV, wala pa raw yung makakasama namin sa bicol, standby lang daw kami... medyo nahihiya naman ang group na nakatambay lang sa labas, kaya kahit alam na may byahe pa ay sige pa rin ang pagtulong sa pagbubuhat pag kailangan. ilang sandali pa ay nagpatawag uli ng meeting si el presidente, yung di makakasama sa bicol ay isasama sa operation sa bulacan, 6 ang naatasan dito. matapos pa ang ilang oras ay lumakad na ang Bulacan team, 5 adtrekkers, 3 AFV's, 7 PNP personnel. teka, di ba't 6 yung dapat na kasama? oo nga, sana... ang problema, isang 6x6 lang ng PNP ang gagamitin nila, wala ng paglagyan ng tao. kaya iwan na lang ang isa... ok lang yun, sobra naman sipag ni daddy bad grass sa paghahakot e (sino yun!!!??)... ano naman ang nangyari sa Bicol team? ayun, nakatunganga pa rin...

lulan ng 6x6 pnp truck na ito ay relief goods na sapat sa 1000 pamilya. kabilang sa grupo na ito ay 5 na adtrekkers, 3 na abs-cbn volunteers, at 7 na pnp officers

dinumog ng mga tao ang evacuation center na ito sa barrio matiktik sa norzagaray bulacan, hindi lang mga evacuees ang nakinabang sa relief good na dala ng sagip kapamilya, pati na rin mg residente ay nakipila na rin, tsk tsk tsk

past 5pm ng ipatawag na ang Bicol team, inayos ang mga dadalhin... pupunta raw muna kami sa audience entrance ng channel 2 upang duon i-meet yung 2 6x6 ng militar. sa kabuuan, 4 adtrekkers, 4 AFV's, 6 PAF's, 3 galing sa fedex/air21 at 3 galing sa mekeni products ang bubuo ng Bicol team. matapos ang ilan pang paghahanda at ilang mga paalala ay handa na sana ang grupo, isa na lang ang kulang... hapunan. medyo gabi na rin at medyo gutom na ang lahat. matapos ang masarap na hapunan, lakad na ang grupo. hiwa-hiwalay ang 4 adtrekkers at 4 na AFV's sa apat na trak na gagamitin.

sila po ang matitipunong grupo na na-deploy sa bicol

pagsakay pa lang ng 6x6 ay ikinasa na ng mga katabi naming sundalo ang mga armalite na dala nila... tila ba naghahanda sa giyera,kakalabitin na lang ang gatilyo nito. di namin malaman kung makakaramdam ba kami ng security o para yatang mas gusto naming kabahan... sino naman ang di mag-iisip ng kung anu ano? hindi ba't kailan lang ay sampung sundalo na tutulong sana sa mga nasalanta ang in-ambush sa bulacan. ito rin ang isang dahilan kung bakit late kami ng 6 na oras. gusto ng mga sundalo na lahat ng gilid ng truck nila ay may banner ng AFV o channel 2, and take note sila ang nakagitna sa apat na truck. sa isang banda ay ok na rin yung nag-iingat. habang nasa byahe na kami, mga bandang 8pm, ay napag-alaman namin na katatapos lang ng bulacan team sa norzagaray. dahil sa gabi na at medyo mataas pa ang tubig sa ilang bahagi ng bulacan ay di na sila nakatuloy sa angat. napag-alaman din namin na nasiraan pa sila habang pabalik ng foundation.

matapos ang 3 stop over, isang ligaw, at siyam na oras na byahe ay binabaybay na namin ang quirino highway at dito kami naipit ng sobrang trapik. dahil medyo madilim pa at medyo liblib ang lugar ay alertong alerto ang mga kasama naming militar. habang abala ang team lider namin sa pakikipag-usap sa PDCC at mga kinauukulan para makaalis kami dun sa lalong madaling panahon ay isang military official ang lumapit sa mga kasama namin. nang malaman na anim lang ang kasama naming sundalo ay tumawag sya sa isang kampo malapit dun upang magpadala pa ng ilang sundalo sa lugar habang di pa kami makaalis dun, mabuti na nga rin yung nag-iingat. at sa tulong nga ng eskort naming taga PDCC ay binigyang priority ang aming convoy na makadaan dun... ang sanhi ng trapik ay ang gumuhong kalahating bahagi ng maharlika hi-way sa may bandang sipocot, kaya pala kung ilang kilometro ang pila ng mga 10 wheeler at container van. at sabi ng ilang driver dun ay isang linggo na sila dun na naghihintay na magawa ang kalsada. matapos pa ang ilang oras na byahe ay narating din namin ang ABS-CBN Naga station, 13 oras mula channel2 sa QC hanggang Naga City.

sa kabila ng panganib na kasama ang militar sa ganitong klaseng operation ay di alintana ng mga adtrekkers, makatulong lang sa mga kapatid nating nasalanta ng bagyo

ang masamang kondisyon ng lansangan ay di hadlang para maisagawa ang relief operation

sa kabuuan ay anim na bayan sa camarines sur ang nabigyan ng relief goods ng foundation, humigit kumulang sa tatlong libo. lahat ng pamimigay ay tinapos lang sa luob ng isa't kalahating araw, kasama na duon ang konting tulog. sa dami ng dala naman ay di pa rin nagawang bigyan ang lahat ng pamilyang nakapila sa bawat bayang aming pinuntahan. may maririnig kang pasasalamat, pakunswelo mo na yun, may mga kung anu-ano ang sinasabi lalo na at di mo nabigyan. mabigat pa nun ay pag kinausap ka nila gamit ang lenggwahe nila, maghahanap ka muna ng translator mo bago kayo magkaintindihan. sa aming obserbasyon ay hindi ganun ka-grabe ang inabot nila sa mga bagyong nagdaan na gaya ng inabot ng nueva ecija, quezon at aurora. ang ilan sa problemang nakita namin ay ang mga binahang palayan at black out sa maraming lugar at ang gumuhong kalsada sa maharlika hi-way. matapos ang huling bayan na dinalhan namin, ang bayan ng camaligan, ay pinakain kami ng vice-mayor dito sa isang masarap na kainan sa Naga City. matapos ang hapunan ay ilang volunteer ang dumaan sandali sa simbahan ng Peñafrancia. nang makabalik sa station ay pinaghanda agad kami para sa byaheng pabalik ng manila. ayos! uwian na, sa matagtag na byahe na lang kami magpapahinga. may 2 pasaway na nag-setup ng mga hammock nila sa luob ng truck na sinasakyan namin. akala nila ay magiging masarap ang tulog nila. bwahahahaha!!!! mas naging matagtag para sa kanila ang byahe at mas mabilis silang nahilo kaysa makatulog. paano ba naman, kung magpatakbo ang aming mga driver ay akala mo bang hinahabol ng bagyo sa bilis. makalipas ang mahigit sa walong oras na byahe ay di na namin namalayan na nasa alabang na pala kami.

si mr. tigasin ay may malambot na puso sa mga kababayan natin na nasalanta ng bagyo

napapawi ang pagod ng mga voluntees kapag nakikita mo na nagiging masaya ang mga evacuees sa tulong na natatanggap nila

6 na munisipalidad ang natulungan ng bicol relief operation group sa loob ng 2 araw. nakakapagod ika nga ng mga volunteers pero masaya ang pakiramdam dahil naging matagumpay naman ang operation doon

sa araw ng pagbalik namin ng manila(martes), ay isang grupo na naman ng adtrekkers ang nabuo upang sila naman ang magtungo sa foundation at tumulong sa kung anu mang paraan. matapos ang isang maghapon na pagrere-pack at pagbubuhat ay na-deploy rin sila sa ibang bayan naman ng Bulacan.

Reflection:

sa kabuuan ay 14 na miyembro ng ADTREK-MC ang kusang luob na nagtungo sa foundation upang makatulong sa anumang paraan na magagawa nila. anuman ang nagtulak sa kanila upang gawin yun ay walang nakakaalam kung hindi tanging sila lamang. ngunit wag sana nating kalimutan na ilan lamang sila sa libo libong tumulong sa mga kapatid nating nangangailangan. kung wala ang mga donasyon, ang pagtulong sa pagrere-pack ng marami, ang pagbubuhat, pag-transport ng mga relief at pamamahagi nito ay di rin magkakaruon ng katuparan ang isang relief operation. isang maliit na tulong ng bawat isang tao, kapag pinagsama sama ay sadyang nakamamangha. wag din nating kaliumutan na di lamang ABS-CBN foundation ang may relief operation, ang channel 7, NDCC, DSWD, PNRC at ilang pribadong sektor. tunay na lumalabas ang pagkakaisa ng mga Filipino sa mga ganitong pagkakataon? kailan kaya magtutulungan tulad nito na walang sakunang magaganap?

sa ganang akin, ang lahat ng paghihirap at pagod na ibinigay ng mga volunteer ay di kayang tapatan ang paghihirap na nararamdaman ng mga kapatid nating nasalanta. kung makikita lamang ng personal ng bawat Filipino ang dinaranas nila ay malamang na maisip nila ang ilan sa mga ito: mapalad ka pa dahil ang problema mo lang ay wala kang load na pang-text, wala kang pera upang makasama sa gala ng barkada o makakain sa mamahaling restaurant, wala ka pang bagong damit para sa pasko, nawalan ka ng boyfriend/girlfriend. ikaw, oo... ikaw nga na nagbabasa nito ngayon, mapalad ka kung ito lang ang problema mo. silang nasalanta? wala ngayong makain, walang ilaw at ligtas na tubig na maiinom, nawala ang bahay, nawalan ng kabuhayan at ilan ay nawalan ng mahal sa buhay..... mapalad ka at nababasa mo pa 'to ....